განა სიყვარულს აგვიანდება?

გინდაც ნუშის ხე მე მყავს თავდებად,

რომ გადათოვლილ იანვრის თვეში

იცის უეცრად ტოტის ანთება.

ირგვლივ თოვლია, ის კი ჩახჩახებს

და გინდაც ყინვამ დააძროს ხვალე,

ის არა დარდობს, უყვარს და ჰყვავის

და თითქოს ამბობს „ შენ გენაცვალე“.

განა სიყვარულს აგვიანდება?

მოსკდა გულში და ცეცხლი ავარდა,

ვინ დაიბარა, ვინ დაუძახა

შემოაქროლა თავისთავადა!

განა სიყვარულს აგვიანდება?

მას იტყვის, ვისაც დაუჭკნა გული!

დაე, ზამთარმა გამოიტყუოს

თუ გულში ცეცხლმა გაინავარდა.